Presentacións en Vigo, Santiago e Pontevedra darán a coñecer o novo número da publicación

Logo de se presentar con grande éxito no último Saló del Còmic de Barcelona, o colectivo BD Banda trae a Galicia o novo número da súa revista. Os afeccionados á BD terán a oportunidade de atopar algúns dos nosos autores en librarías especializadas de Vigo, Santiago e Pontevedra na presentacións que se realizarán ata final de mes.

En concreto, o vindeiro sábado 19 será a libraría Banda Deseñada, de Vigo, a que conte a partir das seis e media da tarde coa presenza de Kiko da Silva, que falará sobre a publicación, e de Jacobo Fernández, que asinará exemplares da mesma. En Santiago a cita será o venres 25 de xuño a partir das sete da tarde na libraría A Gata Tola, coa presenza de Kiko da Silva e mais de Fenrnado Iglesias. Finalmente, esta xeira de presentacións rematará o vindeiro sábado 26 ás 12 da mañá na Libraría Paz de Pontevedra, onde se agarda a presenza de Kiko da Silva e de Jacobo Fernández.

O número 4 de BD Banda ten como eixe a serie As serpes cegas, o recente Premio Nacional de Cómic que remata nesta entrega a súa publicación. Ademais das páxinas correspondentes, a revista inclúe unha ampla entrevista aos autores canda a diferentes ilustracións inéditas e material de traballo. Ademais, continúan as habituais series, como Animais pantasma de Jacobo Fernández, Caveira lunar de Albert Monteys, Ultratumbia de Alberto Guitián, Julie de Calo e Stygryt ou o Astro de Javier Olivares, ademais do artigo de Álvaro Pons e novos contidos.

Calendario de Presentacións

• Sábado 19 ás 18.30h en Banda Deseñada (R/ Cataluña, 27; Vigo): Kiko Da Silva e Jacobo Fernández.
• Venres 25 ás 19h en Gata Tola (Avenida de Romero Donallo 9, Santiago de Compostela ): Kiko Da Silva e Fernando Iglesias.
• Sábado 26 ás 12h en Librería Paz ( R/Peregrina, 29 Pontevedra ): Kiko da Silva e Jacobo Fernández.